ரம்பேவாவில் நேற்று இடம்பெற்ற உயிரிழப்பை ஏற்படுத்திய பேருந்து விபத்து குறித்து விரிவான விசாரணையை மேற்கொள்ளுமாறும், அது தொடர்பான முழுமையான அறிக்கையை நீதிமன்றத்தில் சமர்ப்பிக்குமாறும் மிஹிந்தலை பொலிஸாருக்கு,அனுராதபுரம் மேலதிக நீதிவான் உத்தரவிட்டுள்ளார். மிஹிந்தலை பொலிஸார் சமர்ப்பித்த 'பி-அறிக்கையை' (B-report) அடுத்து, மேலதிக நீதிவான் டி.எல். சமரசிங்க விபத்து இடம்பெற்ற ரம்பேவா பகுதிக்கு நேரில் சென்று, விபத்துக்குள்ளான மூன்று பேருந்துகளையும் பார்வையிட்டுள்ளார். இந்த கள ஆய்வைத் தொடர்ந்து, விபத்துக்குள்ளான மூன்று பேருந்துகள் ஒவ்வொன்றுக்கும் தனித்தனியாக வாகனப் பரிசோதகரிடமிருந்து (Motor Vehicle Examiner) விசாரணை அறிக்கைகளைப் பெற்று, அவற்றை நீதிமன்றத்தில் சமர்ப்பிக்குமாறு பொலிஸாருக்கு நீதிவான் பணித்தார். இதனைத் தொடர்ந்து, அனுராதபுரம் போதனா வைத்தியசாலைக்குச் சென்ற மேலதிக நீதிவான், விபத்தில் உயிரிழந்தவர்களின் சடலங்களைப் பார்வையிட்டார். மேலும், சடலங்களுக்கு உடற்கூற்றுப் பரிசோதனைகளை மேற்கொண்டு, அது தொடர்பான அறிக்கைகளை நீதிமன்றத்தில் சமர்ப்பிக்குமாறு வைத்தியசாலையின் சட்ட மருத்துவ அதிகாரிக்கு அவர் அறிவுறுத்தினார். உடற்கூற்றுப் பரிசோதனைகளின் பின்னர், சடலங்களை அந்தந்த குடும்பத்தினரிடம் ஒப்படைக்குமாறும் உத்தரவிடப்பட்டது. அனுராதபுரம், ரம்பேவா பகுதியில் A9 நெடுஞ்சாலையில் நேற்று இடம்பெற்ற இந்த விபத்தில், இலங்கை போக்குவரத்து சபைக்கு சொந்தமான இரண்டு பேருந்துகளும் ஒரு தனியார் பேருந்தும் மோதிக்கொண்டன. இதில் ஐந்து பேர் உயிரிழந்ததுடன், 71 பேர் காயமடைந்தனர். பொலிஸாரின் ஆரம்பகட்ட விசாரணைகளின்படி, பேருந்து ஓட்டுநர் ஒருவரின் ஆபத்தான மற்றும் பொறுப்பற்ற வாகனச் செலுத்துதலே இந்த விபத்துக்குக் காரணமாக இருந்திருக்கலாம் என்று தெரியவந்துள்ளது. வவுனியாவிலிருந்து ரம்பேவா நோக்கிச் சென்ற இலங்கை போக்குவரத்து சபைக்குச் சொந்தமான பேருந்து ஒன்று, அதே திசையில் சென்ற தனியார் பேருந்தை முந்திச் செல்ல முயன்றபோது, ​​எதிரே வந்த மற்றொரு இலங்கை போக்குவரத்து சபைப் பேருந்துடன் நேருக்கு நேர் மோதியதாலேயே இந்த விபத்து இடம்பெற்றுள்ளதாகக் கூறப்படுகிறது.

பல உயிர்களை காவு கொண்ட பேருந்து விபத்து - நீதிமன்றம் பிறப்பித்துள்ள உத்தரவு

பல உயிர்களை காவு கொண்ட பேருந்து விபத்து - நீதிமன்றம் பிறப்பித்துள்ள உத்தரவு

You may also like