&nbsp;இந்தோனேசியாவிலிருந்து வந்த ஸ்ரீலங்கன் எயார்லைன்ஸ் விமானத்தை கடத்த முயற்சிப்பதாக 119 என்ற பொலிஸ் அவசர இலக்கத்துக்கு அழைப்பெடுத்து பொய்யான தகவலை பரப்பியமைக்காக 43 வயது சந்தேக நபர் வெள்ளவத்தையில் கைது செய்யப்பட்டுள்ளார்.&nbsp;சந்தேக நபர் நேற்று ஸ்ரீலங்கன் எயார்லைன்ஸ், மற்றும் ஜனாதிபதி செயலகம் உள்ளிட்ட பல்வேறு பாதுகாப்பு நிறுவனங்களுக்கு பல அழைப்புகளை மேற்கொண்டு, ஒரு குழு விமானத்தை கடத்த திட்டமிட்டுள்ளதாக பொய்யாக எச்சரித்ததாக பொலிஸார் தெரிவித்தனர்.&nbsp;தொலைபேசி பகுப்பாய்வு தரவுகளைப் பயன்படுத்தி வெள்ளவத்தை பொலிஸார் நடத்திய விசாரணையில், வெள்ளவத்தை 33வது ஒழுங்கையில் உள்ள ஹோட்டல் ஒன்றிலிருந்து சந்தேக நபர் கைதுசெய்யப்பட்டார்.&nbsp;சந்தேக நபர் மூன்று மாதங்களுக்கு முன்பு குறித்த ஹோட்டலுக்கு வந்ததுடன், ஒரு இரவு தங்குவதற்கு ரூ. 3,000 செலுத்தியதாக பொலிஸ் விசாரணைகளில் தெரியவந்துள்ளது. &nbsp;மேலும், சந்தேகநபர் ஒரு வேலைவாய்ப்பு நிறுவனத்தை நடத்தி வருவதாகவும், அவருக்கு யாழ்ப்பாணம் நீதவான் நீதிமன்றத்தால் பிறப்பிக்கப்பட்ட பிடியாணை இருப்பதாகவும் தெரியவந்துள்ளது.&nbsp;மேலும் விசாரணைகளில், சந்தேக நபரின் வங்கிக் கணக்கில் வெளிநாட்டிலிருந்து அமெரிக்க டொலர் பணம் பெறப்பட்டுள்ளதாகவும் இந்த பரிவர்த்தனைகள் குறித்தும் பொலிஸார் விசாரணையைத் தொடங்கியுள்ளனர்.&nbsp;சந்தேக நபரிடமிருந்து ஒரு டெப்லெட் கணினி, ஒரு ஐபோன், ஒரு சிறிய வைஃபை ரௌட்டர், ஒரு ஜோடி ஹெட்செட்கள் மற்றும் பணப் பரிமாற்றங்கள் தொடர்பான பல வங்கி பற்றுச்சீட்டுகள் கைப்பற்றப்பட்டுள்ளன.&nbsp;டெப்லெட்டில் விடுதலைப் புலிகளின் தலைவர்கள் மற்றும் கொடிகளின் புகைப்படங்கள், நாட்டுத் தலைவர்கள் மற்றும் விமான நிலையங்கள் மற்றும் விமானங்களின் படங்கள் இருந்ததாகக் கூறப்படுகிறது.&nbsp;கொழும்பு 15இல் வசிக்கும் சந்தேக நபர், மேலதிக விசாரணைகளுக்காக கட்டுநாயக்க விமான நிலைய பொலிஸாரிடம் ஒப்படைக்கப்பட்டுள்ளார்.

ஸ்ரீலங்கன் எயார்லைன்ஸ் விமானத்தைக் கடத்த முயற்சிப்பதாக பொய்யான தகவலை வழங்கியவர் கைது

ஸ்ரீலங்கன் எயார்லைன்ஸ் விமானத்தைக் கடத்த முயற்சிப்பதாக பொய்யான தகவலை வழங்கியவர் கைது

You may also like