‘MasterChef Sri Lanka Season 2’ சமையல் போட்டியில் வெற்றி பெற்று சாதனை படைத்த நர்மதா பாலசுப்பிரமணியத்திற்கு, கடந்த 26ஆம் திகதி ஹட்டனில் மகத்தான வரவேற்பும் பாராட்டு விழாவும் ஏற்பாடு செய்யப்பட்டன. ஹட்டன் கிருஷ்ண பகவான் கலாசார மண்டபத்தில் நடைபெற்ற இவ்விழாவிற்காக, காலை 10 மணியளவில் ஹட்டன் மல்லியப்பூ சந்தியிலிருந்து வாகனப் பேரணி மூலம் நர்மதா அழைத்து வரப்பட்டார். இதன்போது அங்கு திரண்டிருந்த நூற்றுக்கணக்கான மக்கள் அவருக்கு உற்சாக வரவேற்பளித்தனர். பேரணி மண்டபத்தைச் சென்றடைந்ததைத் தொடர்ந்து பாராட்டு விழா ஆரம்பமானது. நிகழ்வில் சிறப்பு விருந்தினர்கள், ஹட்டன் வர்த்தகர்கள், சமூக ஆர்வலர்கள், பாடசாலை நிர்வாகத்தினர் உள்ளிட்ட பலர் கலந்துகொண்டு நர்மதாவைப் பாராட்டிக் கௌரவித்தனர். தனது சமையல் திறமை, படைப்பாற்றல் மற்றும் விடாமுயற்சியால் போட்டியின் பல்வேறு சுற்றுகளைக் கடந்து வெற்றியீட்டிய நர்மதா, மலையக மக்களுக்கும் இலங்கைத் தமிழர்களுக்கும் பெருமை சேர்த்துள்ளார். ஹட்டன் ஹைலண்ட்ஸ் கல்லூரியின் முன்னாள் மாணவியான நர்மதாவின் சாதனை, சமையல் துறையில் சாதிக்க விரும்பும் இளம் தலைமுறையினருக்கு ஊக்கமளிக்கும் முன்னுதாரணமாக அமைந்துள்ளது. இதேவேளை, அவர் கல்வி பயின்ற ஹட்டன் ஹைலண்ட்ஸ் கல்லூரியிலும், கல்லூரி அதிபர் எஸ். ராஜன் தலைமையில் கேட்போர் கூடத்தில் விசேட பாராட்டு விழாவும் கௌரவிப்பு நிகழ்வும் நடைபெற்றமை குறிப்பிடத்தக்கது.

மாஸ்டர் செஃப் நர்மதா பாலசுப்பிரமணியத்திற்கு ஹட்டனில் உற்சாக வரவேற்பு!

மாஸ்டர் செஃப் நர்மதா பாலசுப்பிரமணியத்திற்கு ஹட்டனில் உற்சாக வரவேற்பு!

You may also like