திருகோணமலை மாவட்டச் செயலகத்தில் இன்று (25) மாவட்ட அபிவிருத்தி ஒருங்கிணைப்புக் குழுக் கூட்டம் நடைபெற்றது. இக்கூட்டம், மாவட்ட ஒருங்கிணைப்புக் குழுத் தலைவரும் வெளிவிவகார,வெளிநாட்டு வேலைவாய்ப்பு பிரதி அமைச்சருமான அருண் ஹேமச்சந்திரா மற்றும் கிழக்கு மாகாண ஆளுநர் ஜெயேந்தலால் ரத்னசேகர ஆகியோரின் இணைத் தலைமையில், மாவட்ட அரசாங்க அதிபர் W. G. M. ஹேமச்சந்திராவின் ஒருங்கிணைப்பில் இடம்பெற்றது.&nbsp; இக்கூட்டத்தில் சுற்றாடல் பிரதி அமைச்சர் அன்டன் ஜெயகொடியும் கலந்துகொண்டார். இக்கூட்டத்தில் திருகோணமலை மாவட்ட பாராளுமன்ற உறுப்பினர் எஸ்.குகதாசன் கலந்துகொண்டு, மாவட்டத்தின் அவசர மற்றும் முக்கிய அபிவிருத்தி தேவைகள் குறித்த பல பிரேரணைகளை முன்வைத்தார். இதன்போது அவரால் முன்வைக்கப்பட்ட முக்கிய பிரேரணைகளாவன, பிரதேச செயலக எல்லைச் சிக்கல்கள்: மாவட்டத்தில் உள்ள பிரதேச செயலகப் பிரிவுகளின் எல்லைகளில் தெளிவற்ற நிலைமை காணப்படுவதால் தேவையற்ற தர்க்கங்களும் முரண்பாடுகளும் ஏற்படுகின்றன. எனவே, எல்லைகளைத் தெளிவாக அடையாளம் காண்பதற்கு உடனடியாக நடவடிக்கை எடுக்கப்பட வேண்டும். கனிம மணல் (இல்மனைட்) கொண்டுசெல்லும் டிப்பர் வாகனங்கள் காரணமாக, வீதி அபிவிருத்தி அதிகாரசபைக்குச் (RDA) சொந்தமான புல்மோட்டை கும்புறுப்பிட்டி வீதியானது ஏனைய வாகனங்கள் பயணிக்க முடியாத அளவுக்குக் கடுமையாகச் சேதமடைந்துள்ளது. இவ்வீதிக்கு மேலும் சேதம் ஏற்படுவதைத் தடுக்க உடனடியாக நடவடிக்கை எடுக்கப்பட வேண்டும். திரியாய் மகா வித்யாலயாவிலிருந்து கட்டுக்குளம் வரை செல்லும் சுமார் 3 கிலோமீற்றர் நீளமுள்ள வீதி கடுமையாகச் சேதமடைந்துள்ளது. இதனை எவ்வித தாமதமும் இன்றி முழுமையாகப் புனரமைக்க வேண்டும். கடுமையாகச் சேதமடைந்துள்ள நீலபணிக்கன்குளம் வீதியினால் ஆயிரத்துக்கும் மேற்பட்ட விவசாயிகள் தமது விவசாய நடவடிக்கைகளை மேற்கொள்வதில் பெரும் சிரமங்களை எதிர்நோக்குகின்றனர். இவ்வீதியையும் முழுமையாகப் புனரமைக்க நடவடிக்கை எடுக்க வேண்டும். கட்டைப்பறிச்சான் பாலம்: மூதூர் பிரதேச செயலகப் பிரிவிலுள்ள கட்டைப்பறிச்சான் பாலம் இடிந்து விழும் அபாய நிலையில் காணப்படுவதால், அதனைப் புதிதாக அமைப்பதற்கு நடவடிக்கை எடுக்கப்பட வேண்டும். வெருகல் பிரதேச செயலகப் பிரிவில் கடலுக்கும் களப்புக்கும் இடையில் வாழும் மக்களின் உயிர்களை இயற்கை அனர்த்தக் காலங்களில் பாதுகாப்பதற்காக, புன்னையடி பாலத்தைக் கட்டுவதற்கு நடவடிக்கை எடுக்க வேண்டும். கிளிவெட்டி கிராமியக் குடிநீர்த் திட்டத்தின் பொறுப்பை தேசிய நீர் வழங்கல் மற்றும் வடிகாலமைப்புச் சபையிடம் ஒப்படைக்கும் நடவடிக்கைகளை விரைவாக முடிப்பதற்கு நடவடிக்கை எடுக்கப்பட வேண்டும். மாவட்டத்தின் பொது மக்கள் மற்றும் விவசாயிகளின் நலன் கருதி முன்வைக்கப்பட்டுள்ள இந்தப் பிரேரணைகள் மீது உரிய அதிகாரிகள் உடனடியாகக் கவனம் செலுத்தி நடவடிக்கை எடுக்க வேண்டும் என பாராளுமன்ற உறுப்பினர் எஸ்.குகதாசன் வலியுறுத்தினார். (கியாஸ் ஷாபி)

குகதாசன் எம்.பி.முன்வைத்த முக்கிய பிரேரணைகள்!

குகதாசன் எம்.பி.முன்வைத்த முக்கிய பிரேரணைகள்!

You may also like