ஹோர்முஸ் நீரிணை ஈரானிய அரசின் கட்டுப்பாட்டிலேயே இருப்பதாக ஈரானின் இராணுவத் தலைவர்கள் மற்றும் முக்கிய அதிகாரிகள் தொடர்ந்து தெரிவித்து வருகின்றனர். அமெரிக்கா மற்றும் ஈரான் இடையிலான அமைதி ஒப்பந்தம் கடந்த ஜூன் மாதம் இரத்து செய்யப்பட்டதைத் தொடர்ந்து இரு நாடுகளுக்கும் இடையே மீண்டும் போர் தொடங்கியுள்ளதாக தெரிவிக்கப்பட்டுள்ளது.&nbsp; இதன் பின்னணியில், சர்வதேச எரிபொருள் விநியோகத்தில் முக்கியத்துவம் வாய்ந்த ஹோர்முஸ் நீரிணை மீதான கட்டுப்பாடு தொடர்பாக இரு தரப்புக்கும் இடையே கடும் மோதல் நிலவி வருகின்றது. ஹோர்முஸ் நீரிணையை ஈரானிய படைகள் முற்றாக முடக்கியுள்ளதாகவும், இதனால் அமெரிக்க கடற்படை அப்பகுதியில் முற்றுகை நடவடிக்கையில் ஈடுபட்டு வருவதாகவும் கூறப்படுகின்றது. எனினும், ஹோர்முஸ் நீரிணை முழுமையாக அமெரிக்காவின் கட்டுப்பாட்டுக்குள் வந்துவிட்டதாக அமெரிக்க ஜனாதிபதி டொனால்ட் ட்ரம்ப் தொடர்ந்து தெரிவித்து வருகிறார். இது தொடர்பில், நேற்று (12) வெளியிட்ட சமூக ஊடகப் பதிவில், ஹோர்முஸ் நீரிணை மீது அமெரிக்கா முழுமையான கட்டுப்பாட்டைக் கொண்டுள்ளதாகவும், அதனை தொடர்ந்து தக்கவைத்துக்கொள்ளும் எனவும் ட்ரம்ப் தெரிவித்திருந்தார். இந்த நிலையில், ட்ரம்பின் கருத்துக்கு பதிலளிக்கும் வகையில் ஈரானின் முக்கிய அதிகாரிகளும் இராணுவத் தளபதிகளும் ஹோர்முஸ் நீரிணை மீதான ஈரானின் கட்டுப்பாட்டை உறுதிப்படுத்தி வருகின்றனர். ஈரானின் புரட்சிகர காவல் படையுடன் தொடர்புடைய துணை இராணுவப் படையின் தளபதி ஹுசைன் தயீப், ஹோர்முஸ் நீரிணை தற்போது ஈரானின் நிர்வாகம் மற்றும் கட்டுப்பாட்டின் கீழ் இருப்பதாக இன்று தெரிவித்துள்ளார். மேலும், ஈரான் வெளியுறவு அமைச்சர் அப்பாஸ் அராக்சி, உளவுத்துறை தோல்வி காரணமாக ஹோர்முஸ் நீரிணை விவகாரத்தில் அமெரிக்கா தொடர்ந்து தவறான கணிப்புகளை மேற்கொண்டு வருவதாக குற்றஞ்சாட்டியுள்ளார்.

ஹோர்முஸ் நீரிணை ஈரான் கட்டுப்பாட்டிலேயே உள்ளது – ஈரான் அதிகாரிகள் உறுதி

ஹோர்முஸ் நீரிணை ஈரான் கட்டுப்பாட்டிலேயே உள்ளது – ஈரான் அதிகாரிகள் உறுதி

You may also like