நோர்வூட் பிரதேச செயலகத்தில் அஸ்வெசும நலன்புரித் திட்டத்தின் 1 கோடியே 62 இலட்சம் ரூபாய் நிதி மோசடி தொடர்பில் கைது செய்யப்பட்ட இரு சந்தேகநபர்களையும் எதிர்வரும் 25ஆம் திகதி வரை விளக்கமறியலில் வைக்க ஹட்டன் நீதவான் நீதிமன்றம் உத்தரவிட்டுள்ளது. சந்தேகநபர்கள் இருவரும் இன்று (11) ஹட்டன் நீதவான் பீட்டர் பால் முன்னிலையில் முன்னிலைப்படுத்தப்பட்டபோதே இந்த உத்தரவு பிறப்பிக்கப்பட்டுள்ளது. நோர்வூட் பிரதேச செயலகத்தின் அஸ்வெசும பிரிவில் பொறுப்பாளர்களாகப் பணியாற்றிய ஹட்டன் – டிக்கோயா பகுதியைச் சேர்ந்த 31 மற்றும் 32 வயதுடைய இருவரே இவ்வாறு விளக்கமறியலில் வைக்கப்பட்டுள்ளனர். இவர்கள் இருவரும் கைது செய்யப்பட்டு விசாரணைக்கு உட்படுத்தப்பட்ட பின்னர், கடந்த முதலாம் திகதி நீதிமன்றத்தில் முன்னிலைப்படுத்தப்பட்டனர். இதன்போது அவர்களை இன்று வரை விளக்கமறியலில் வைக்க நீதிமன்றம் உத்தரவிட்டிருந்தது. இந்நிலையில், இன்று நீதிமன்றத்தில் முன்னிலைப்படுத்தப்பட்ட சந்தேகநபர்களுக்காக ஆஜரான சட்டத்தரணிகள், தமது கட்சிக்காரர்கள் குற்றத்தை ஒப்புக்கொண்டுள்ளதாகவும், மோசடி செய்யப்பட்ட பணத்தை மீள வங்கிக் கணக்கில் செலுத்துவதற்கு அவர்கள் இணங்கியுள்ளதாகவும் தெரிவித்து பிணை வழங்குமாறு கோரினர். எனினும், ஹட்டன் குற்றப் புலனாய்வுப் பிரிவு அதிகாரிகள் அதற்கு எதிர்ப்பு தெரிவித்தனர். மோசடி செய்யப்பட்ட நிதி தொடர்பான முழுமையான விசாரணை அறிக்கை இன்னும் சமர்ப்பிக்கப்படவில்லை என்றும், இந்த மோசடியில் நோர்வூட் பிரதேச செயலகத்தின் மேலும் சில அதிகாரிகள் தொடர்புபட்டுள்ளதாக கிடைத்துள்ள முறைப்பாடு தொடர்பிலும் விசாரணைகள் இடம்பெற்று வருவதாகவும் அவர்கள் நீதிமன்றத்தில் தெரிவித்தனர். இருதரப்பு வாதங்களையும் பரிசீலித்த நீதவான் பீட்டர் பால், இது ஏழை மக்களுக்கு வழங்கப்பட வேண்டிய அரச நிதி எனச் சுட்டிக்காட்டியதுடன், அரச நிதிக்குப் பொறுப்பான அதிகாரிகள் அதனை மோசடி செய்ய எந்த உரிமையும் இல்லை எனத் தெரிவித்துள்ளார். இதனையடுத்து, சந்தேகநபர்கள் இருவரையும் தொடர்ந்து விளக்கமறியலில் வைக்க உத்தரவிட்ட நீதவான், வழக்கை எதிர்வரும் 25ஆம் திகதி மீண்டும் விசாரணைக்கு எடுத்துக்கொள்ள உத்தரவிட்டார். இதனிடையே, சந்தேகநபர்களில் ஒருவரின் சகோதரர் நுவரெலியா மாவட்ட செயலகத்தில் உயர் பதவி வகிக்கும் அதிகாரி எனவும், மோசடி செய்யப்பட்ட பணத்தின் ஒரு பகுதி அவரது வங்கிக் கணக்கிலும் வரவு வைக்கப்பட்டுள்ளதாக விசாரணைகளில் தெரியவந்துள்ளதாகவும் தெரிவிக்கப்பட்டுள்ளது. இதையடுத்து, குறித்த அதிகாரியை தற்காலிகமாக இடைநீக்கம் செய்ய நுவரெலியா மாவட்ட செயலாளர் நடவடிக்கை எடுத்துள்ளார். மேலும், நோர்வூட் பிரதேச செயலகத்தின் அஸ்வெசும கணக்கில் நிதி வரவு வைக்கப்படாத பயனாளிகள், தமது கணக்குகளைச் சரிபார்ப்பதற்காக தினமும் பிரதேச செயலகத்துக்கு வருகை தருவதாகவும் தெரிவிக்கப்பட்டுள்ளது. (நானுஓயா நிருபர்)

நோர்வூட்டில் அஸ்வெசும மோசடி - இருவருக்கும் விளக்கமறியல் நீடிப்பு

நோர்வூட்டில் அஸ்வெசும மோசடி - இருவருக்கும் விளக்கமறியல் நீடிப்பு

You may also like