நிமோனியா மிகக் கடுமையான தாக்கத்தை ஏற்படுத்தக்கூடிய நுரையீரல் தொற்றுநோயாகும். இது நுரையீரல் செல்களில் நேரிடும் அழற்சியால் ஏற்படுகிறது. இதில் ஹீமோபிலஸ், கிளமிடோபிலா, மைக்கோபிளாஸ்மா போன்ற நிமோனியா வகைகளும் காணப்படுகின்றன. வைரஸ்கள், பக்றீரியாக்கள் அல்லது பூஞ்சைகளால் நுரையீரலில் தொற்றை ஏற்படுத்துகின்றது. நிமோனியா இலேசான பாதிப்பாகவோ அல்லது சில நிகழ்வுகளில் உயிரிழப்பை ஏற்படுத்தும் பெரிய பாதிப்பாகவோ இருக்கும். நுரையீரலில் மிகவும் சிறிய காற்றுப்பைகள் உள்ளன. அவை அல்வியோலி (alveoli) என்று அழைக்கப்படுகின்றன. இவை பக்றீரியா தொற்றுக்கு உள்ளாகும்போது நிமோனியாவை உண்டாக்குகிறது. உடலில் அல்வியோலிவின் செயற்பாடு மிகவும் முக்கியமானதாகும். சுவாச செயற்பாடுகளில் ஒக்சிஜன், காபனீரொட்சைட் ஆகியவற்றின் பரிமாற்றங்கள் நுரையீரலின் சிறிய காற்றுப்பைகள், இரத்தம் வாயிலாகவே நடைபெறுகிறது. அல்வியோலி வாயிலாக ஒக்சிஜன் உடலின் அனைத்து செல்களுக்கும் அனுப்பப்படுகிறது. பக்றீரியா தொற்றுகள் காரணமாக அல்வியோலிவில் நீர் அல்லது சீழ் சேர்கிறது. இது அதன் செயற்பாட்டைக் குறைப்பதால் சுவாசத்தில் பிரச்சினையை ஏற்படுத்தி காற்றுப்பைகளில் நீர் சேர்வதால் ஒக்சிஜனின் தரம் குறைந்து இரத்தத்தில் ஒக்சிஜன் கலக்கும் செயல்முறையைத் தடுக்கிறது. இத்தொற்று பல வழிகளில் ஏற்படுகின்றது. அதாவது, முதல்நிலை நிமோனியா, ஆரோக்கியமான நுறையீரலில் ஏற்படுகிறது. இரண்டாம் நிலை நிமோனியா ஏற்கனவே சிதைவுற்ற நுரையீரலில் அல்லது நோய்த்தொற்றின் காரணமாக கடந்த காலங்களில் காயப்பட்ட நுரையீரல் அல்லது பிறவிக்கோளாறுகள் உள்ள நிலையில் ஏற்படுகின்றது. கொரோனா காலகட்டத்தில் கொவிட் -19 வைரஸ் தொற்றின் காரணமாக பல இலட்சம் நோயாளர்கள் பாதிக்கப்பட்டனர். கொவிட் - நிமோனியா தொற்றுக் காரணமாக உலகளவில் 66 கோடி மக்கள் பாதிக்கப்பட்டுள்ளனர். சுமார் 66.1 வீதமானோர் இதன் காரணமாக உயிரிழக்கவும் நேரிட்டது. 2019 ஆம் ஆண்டு தொடங்கிய கொரோனா வைரஸ் பரவல் இன்னும் முழுவதுமாக முடிந்தபாடில்லை. இதன் பாதிப்பும் இறப்பும் இன்னும் தொடர்ந்த வண்ணமே உள்ளது. பக்றீரியா, வைரஸ்கள் ஆகியவற்றின் காரணமாகவே நிமோனியா ஏற்படுகிறது. பக்றீரியாவால் ஏற்படும் நிமோனியாவுக்கு பக்றீரியாக்கள் முக்கிய காரணமாக இருக்கின்றன. இது மக்களிடம் தொற்றுவதுடன் பரவவும் செய்கிறது. குறிப்பாக, ஆர்.எஸ்.வி. வைரஸ் சிறு குழந்தைகளுக்கு நிமோனியா வர முக்கிய காரணமாகவும் அமைகின்றது. பரா இன்ஃபுளூவன்ஸா, இன்ஃபுளூவன்ஸா வைரஸ், கொரோனா வைரஸ்,&nbsp;ரைனோ வைரஸ் மற்றும் பல்வேறு வகையான பூஞ்சைகளும் நிமோனியா ஏற்படக் காரணமாக இருக்கின்றன. நிமோனியாவுக்கும் கொரோனாவுக்கும் எந்தச் சம்பந்தமும் இல்லை.&nbsp;கொரோனா என்பது கொவிட்&nbsp;வைரஸால் உண்டாகும் ஒரு வைரல் காய்ச்சலாகும். நிமோனியா&nbsp;நுரையீரலில் ஏற்படும் தொற்றுநோயாகும். இதைத்தான் நிமோனியா&nbsp;காய்ச்சல் என்கின்றோம். வைரஸ் அல்லது கிருமி நிமோனியா பாதிப்பை ஏற்படுத்துவதற்கும் உடலின் வழியே பரவுவதற்கும் சில நாட்கள் முதல் சில வாரங்கள் வரை எடுக்கின்றதென்றும் பல்வேறு காரணங்களால் நிமோனியாத்தொற்று பரவக்கூடுமெனவும் உலக சுகாதார நிறுவனம் கூறுகின்றது. குழந்தைகளின் தொண்டை, மூக்கு பகுதிகளில் வைரஸ், பக்றீரியாக்கள் இருப்பதால் இந்நோய் ஏற்படுகிறது. இந்தக் கிருமிகள் நுரையீரலில் நுழைந்து நுரையீரலைத் தாக்குகின்றன. ஒருவர் இருமும்போது வெளிப்படும் கிருமிகள், காற்றில் சிறிய துளிகளாக மக்கள் மத்தியில் பரவுகின்றன. இது தவிர, குழந்தை பிறப்பின் போதோ அல்லது பிறந்த பின்னரோ இரத்தத்தின் மூலம் நிமோனியா பரவ வாய்ப்புகள் உள்ளன. பொது இடங்கள், மருத்துவமனை மற்றும் அதன் சுற்றுப்புறப் பகுதிகள், சுவாசக் கருவிகளைப் பயன்படுத்துதல், உணவு மற்றும் எச்சில் போன்றனவற்றால் நிமோனியாத் தாக்கம் பரவவாய்ப்புள்ளது. இந்நோய் எந்த வயதினரையும் பாதிக்கலாம். குறிப்பாக, நோயெதிர்ப்பு சக்தி குறைவாக இருக்கின்ற ஆறு வயதுக்குட்பட்ட குழந்தைகள், 60 வயதைக் கடந்தவர்கள் ஆகியோரை&nbsp;அதிகம் பாதிக்கின்றது.&nbsp;அதாவது, உடலில் நோயெதிர்ப்பு சக்தி குறைவாக இருந்தால் நிமோனியா வர வாய்ப்புகள் அதிகமாகும். நீரிழிவுநோய், புகை பிடித்தல் மற்றும் மது அருந்தும் பழக்கம் உள்ளவர்கள், ஆஸ்த்துமா உள்ளிட்ட நெஞ்சுச் சளி பிரச்சினை உள்ளவர்கள், கர்ப்பிணித்தாய்மார்கள், இதய நோயால் பாதிக்கப்பட்டவர்கள், சிறுநீரகப் பாதிப்புக் குள்ளானவர்கள், புற்றுநோய்க்கு எடுக்கும் ஸ்ட்ரோயிட்ஸ் மருந்துகளைப் பாவிப்பவர்கள் போன்றோரை நிமோனியா தாக்குவதற்கு வாய்ப்புண்டு. மேலும், நாட்பட்ட மூச்சுக்குழாய் அடைப்பு நோயினால் அவதிப்படுபவர்கள் 90 சதவீதம் இந்த நோயினால் தாக்கப்படலாம். அதேபோன்று, எச்.ஐ.வியால் பாதிக்கப்பட்டவர்களையும் ஹீமோதெரபி செய்பவர்களையும் நிமோனியா விரைவில் தாக்குகின்றது. இவர்களுக்கு விரைவில் உயிராபத்து ஏற்படக் காரணமாகவும் அமையும். எனவே, இரண்டு அல்லது மூன்று அறிகுறிகள் தென்பட்டவுடனேயே வைத்தியரை அணுகி எதிர்ப்பு மருந்துகள், சிகிச்சைகளைப் பெற்றுக்கொள்ள வேண்டும். தொற்றின் அறிகுறிகளைப் பொறுத்து சில நோயாளர்களுக்கு லேசானதாகவும் அல்லது சிலருக்கு உயிருக்கு அச்சுறுத்தல் ஏற்படுத்தக்கூடியதாகவும் இருக்கும். அதாவது, சுவாசிப்பதில் தடை, சுவாசிப்பதில் சிரமம் மற்றும் மேலோட்டமான சுவாசம், மூச்சுத் திணறல், மூச்சு வாங்குதல், இதயத்துடிப்பு அதிகரித்தல், சுவாசிக்கும்போதும் இருமும்போதும் மார்பு வலி, சளி அல்லது சளியை உருவாக்கும் இருமல், சோர்வு, பசியின்மை, காய்ச்சல், குளிர்ச்சி மற்றும் அதிக வியர்வை, குமட்டல், வாந்தி, வயிற்றுப்போக்கு, மலச்சிக்கல், கைகால் கணுக்காலில் வீக்கம், உதடுகள் வெளிறிப்போதல் அல்லது நீலம் பூத்தல், காதுவலி, மங்கலான பார்வை, வாசனை இழப்பு அல்லது தொடுதல் இழப்பு&nbsp;போன்ற அறிகுறிகள் காணப்படும். நிமோனியா குழந்தைகளைத் தாக்கும்போது பல அறிகுறிகள் தென்பட்டாலும் அதில் காய்ச்சல், சுவாசிப்பதில் சிரமம், மேலோட்டமான சுவாசம், அடிவயிறு செயற்பாடு போன்றவற்றின் முக்கிய அறிகுறிகளை வைத்து அடையாளம் கண்டுகொள்ளலாம். அதாவது, காய்ச்சல் - பல்வேறு காரணங்களால் குழந்தைகளுக்கு காய்ச்சல் ஏற்படும். கிருமிகள் அழிக்கப்பட்டவுடன் இந்தக் காய்ச்சல் குணமாகிவிடும். இது குழந்தைகளிடம் நோய் எதிர்ப்பு சக்தியை அதிகரிக்கும். எனினும், காய்ச்சல் மிகவும் அதிகமாக அல்லது மருந்துகள் கொடுத்தும் குணமாகவில்லை என்றாலோ, குழந்தைகள் செயலின்றிக் காணப்பட்டாலோ அந்தக் குழந்தையை உடனடியாக வைத்தியரிடம் அழைத்துச் செல்ல வேண்டும். சுவாசிப்பதில் சிரமம் - குழந்தைகளின் சுவாச ஓட்டம் நாளொன்றுக்கு பலமுறை வேறுபட்டுக் காணப்படும். ஒருவேளை இத்தொற்று ஏற்பட்டிருந்தால் குழந்தை சுவாசிப்பதற்கு சிரமப்படத் தொடங்கும். சில குழந்தைகள் சுவாசிக்கும்போது விசில் போன்ற சத்தத்துடன் சுவாசிக்கும். மேலோட்டமான சுவாசம் - நிமோனியா பாதிப்பின்போது நுரையீரலில் நீர் சேர்வதால் சுவாசிப்பதில் சிக்கலை ஏற்படுத்துகிறது. குழந்தைகளைப் பொறுத்தவரை மேலோட்டமான சுவாசம் என்பது விரும்பத்தகுந்ததல்ல. இதுபோன்ற நிகழ்வுகளில் குழந்தை வழக்கத்துக்கு மாறாக மிகவும் அமைதியாக இருந்தால், உடனடியாக வைத்திய ஆலோசனையைப் பெற்றுக்கொள்ள வேண்டும். அடிவயிறு செயற்பாடு - குழந்தைகளின் அடிவயிறு இயக்கத்தை பெற்றோர் கண்காணிக்க வேண்டும். குழந்தை சுவாசிப்பதற்கு சிரமப்பட்டாலோ அல்லது சுவாசிக்க சிக்கலாக இருந்தாலோ அதனை பெற்றோர் அறிந்து கொள்ள வேண்டும். குழந்தை சளியால் பாதிக்கப்பட்டால் தொடர்ந்து நிமோனியா வரும் என்று அர்த்தமல்ல. ஆனால், இந்த முக்கிய அறிகுறிகளில் நாம் விழிப்போடு இருந்தால் நிமோனியாவின் தாக்கத்திலிருந்து எம் குழந்தைகளைப் பாதுகாக்க முடியும். நீரிழிவு நோயாளர்கள், ஆஸ்த்துமா, நுரையீரல் நோய்களால் பாதிக்கப்பட்டவர்கள், ஐந்து வயதுக்குட்பட்ட குழந்தைகள் உள்ளிட்டோா் நிமோனியா காய்ச்சல் குறித்து கூடுதல் எச்சரிக்கையுடன் இருத்தல் அவசியமாகும். உரிய மருத்துவக் கண்காணிப்பு இல்லாத பட்சத்தில் நிமோனியா காய்ச்சலால் பாதிக்கப்பட்டு சிலவேளைகளில் உயிரிழக்கவும் நேரிடுகிறது. குறிப்பாக, ஒருவருக்கு நிமோனியா ஏற்படும் நிலையில், தனிநபர் சுகாதாரம் பேணுவதுடன் முகக்கவசம் அணிந்து கொள்வதன் மூலம் ஏனையவர்களுக்கு தொற்றுப் பரவுவதைத் தடுக்க முடியும். மட்டு. துஷாரா

மிகக் கடுமையான தாக்கத்தை ஏற்படுத்தக்கூடிய நுரையீரல் தொற்றுநோய் நிமோனியா

மிகக் கடுமையான தாக்கத்தை ஏற்படுத்தக்கூடிய நுரையீரல் தொற்றுநோய் நிமோனியா

You may also like