கல்வி வெளியீட்டுத் திணைக்களத்தினால் வெளியிடப்பட்ட பாடநூல் மற்றும் செயற்பாட்டுப் புத்தகம் காணாமல்போனது தொடர்பில் விசாரணை ஒன்று ஆரம்பிக்கப்பட்டுள்ளதாக கல்வி, உயர்கல்வி மற்றும் தொழிற்கல்வி அமைச்சின் செயலாளர் நாலக களுவெவ தெரிவித்துள்ளார். இன்று (14) நடைபெற்ற நிகழ்வொன்றின் பின்னர் ஊடகங்களுக்குக் கருத்துத் தெரிவிக்கும் போதே அவர்&nbsp;இதனைக் குறிப்பிட்டார்.&nbsp; இச்சம்பவம் குறித்து பொலிஸாரிடம் முறைப்பாடு செய்யப்பட்டுள்ளதாக அவர் தெரிவித்தார். கல்வி வெளியீட்டுத் திணைக்களத்தினால் வெளியிடப்படும் பாடநூல்கள் மற்றும் செயற்பாட்டுப் புத்தகங்களை விநியோகிக்கும் பணிகள் ஒப்பந்த அடிப்படையில் தனியார் போக்குவரத்து நிறுவனம் ஒன்றின் மூலமாகவே மேற்கொள்ளப்படுகின்றன எனவும், காணாமல்போன புத்தகங்களின் தொகையைச் சம்பந்தப்பட்ட நிறுவனத்திடமிருந்து அறவிடுவதற்கான நடவடிக்கைகள் எடுக்கப்படும் எனவும் அவர் தெரிவித்தார். சுமார் 800,000 ரூபா பெறுமதியான பாடநூல்கள் மற்றும் செயற்பாட்டுப் புத்தகங்கள் உரிய முறையில் குறிப்பிட்ட விநியோக மையத்திற்கு ஒப்படைக்கப்படவில்லை என கல்வி வெளியீட்டுத் திணைக்கள அதிகாரி ஒருவர் கடந்த ஓகஸ்ட் 12 ஆம் திகதி தலங்கம பொலிஸ் நிலையத்தில் முறைப்பாடு செய்திருந்தார். காணாமல்போன தொகையில், அமைச்சின் இசுருபாய வளாகத்திலுள்ள கல்வி வெளியீட்டுத் திணைக்களத்தால் வெளியிடப்பட்ட 19,892 முதலாம் தர தமிழ் மொழிச் செயற்பாட்டுப் புத்தகங்களும் பாடநூல்களும் அடங்குவதாகத் தெரிவிக்கப்படுகிறது. புத்தகங்களை ஏற்றிச் செல்வதற்காக கல்வி வெளியீட்டுத் திணைக்களத்தால் ஒப்பந்தம் செய்யப்பட்ட தனியார் போக்குவரத்து நிறுவனம் கடந்த மே 4 ஆம் திகதி அனுமதி பெற்றிருந்தது. எனினும், கிழக்கு மாகாணத்திலுள்ள 12 விநியோக மையங்களுக்கு திட்டமிடப்பட்டவாறு இந்த நூல்கள் விநியோகிக்கப்படவில்லை என்பது குறிப்பிடத்தக்கது.

பாடநூல்கள் மாயமானது குறித்து விசாரணை ஆரம்பம் - நாலக களுவெவ

பாடநூல்கள் மாயமானது குறித்து விசாரணை ஆரம்பம் - நாலக களுவெவ

You may also like