பெண்ணியல் நலம் என்பது ஆண்களோடு ஒப்பிடுகையில், மிகவும் தெளிவாக வேறுபடுகிறது. பெண்கள் சந்திக்கும் மிகப்பெரிய மாற்றங்களாக ஹோர்மோன் மாற்றங்களும் மாதவிடாய் பிரச்சினைகளும்&nbsp;கருவுறுதல் பிரச்சினைகளும் மிக முக்கிய பங்கு வகிக்கின்றன. பூப்படைந்த காலம் முதல் மாதவிடாய் நிற்கும் காலம் வரை இப்பிரச்சினைகளுக்கு உட்பட்டேயாக வேண்டும். இவ்வாறு பெண்கள் தங்களின் வாழ்நாள் முழுவதும் எதிர்நோக்கும் உடலியல், உளவியல் ரீதியான பிரச்சினைள் பொதுவாக பெண்ணியல் நோய்களாக இருக்கின்றன. பெண்களை அதிகளவு பாதிக்கும் நோய்களின் பட்டியலை உலக சுகாதார நிறுவனம் வெளியிட்டிருக்கிறது. அதில் கர்ப்பப்பை வாய்ப் புற்றுநோய், மார்பகப் புற்றுநோய், கர்ப்பப்பை புற்றுநோய், பெண் பிறப்புறுப்பு நோய், பாதுகாப்பற்ற உடலுறவால் ஏற்படும் பாலியல் நோய் ஆகியவற்றைத் தொடர்ந்து ஏற்படும் மனநலப் பாதிப்பு பற்றி சுட்டிக்காட்டியுள்ளது. மருத்துவத்துறை அதிவேகமாக முன்னேறிக் கொண்டிருக்கும் இக்காலத்தில் பெண்கள் மருத்துவ ரீதியாக பல்வேறு விழிப்புணர்வுகளைக் கொண்டிருக்கிறார்கள். ஆனாலும், அந்தரங்க உறுப்புகளில் எரிச்சல், அரிப்பு, நமைச்சல் கட்டி, புண், வீக்கம் போன்ற பிரச்சினைகள் ஏற்படும்போது அதைப்பற்றி வெளியில் பேசுவதற்கும் மருத்துவரிடம் ஆலோசனை பெறுவதற்கும் தயக்கம் காட்டுகின்றனர். இவை குறித்து வெளிப்டையாக வைத்தியர்களிடம் ஆலோசனைகளைப் பெற்று சிகிச்சை பெறாவிட்டால் அது ஆபத்தை விளைவிக்கக்கூடும். பெண்களின் இனப்பெருக்க உறுப்பான பிறப்புறுப்பில் ஏற்படும் மாற்றங்களை அடுக்கிக்கொண்டே போகலாம். பெண்களின் வயதுக்கேற்ப சந்திக்கும் பிரச்சினைகளிலும் மாற்றங்கள் ஏற்படலாம். இதைத் தவிர, பெண் பருவமடைதலைத் தொடர்ந்து ஏற்படும் மாதவிடாய் தொடர்பான பிரச்சினைகள், பிற்காலத்தில் மாதவிடாய் நிற்கும் காலப்பகுதியில் ஏற்படும் பிரச்சினைகள் யாவுமே இதில் உள்ளடங்கும். இருப்பினும், பெண்கள் எதிர்நோக்கும் சில குறிப்பிட்ட நோய்களைப் பற்றி பார்த்தால் பெண் உறுப்பில் அரிப்பு, வெள்ளைப்படுதல், பக்டீரியாத் தொற்றுகள், பருக்கள் போன்றவற்றைக் குறிப்பிடலாம். குறிப்பாக, பெண் உறுப்பில் பருக்கள்&nbsp;ஏற்படல், சிறுநீர்ப்பைத் தொற்று, பிறப்புறுப்பில் அரிப்பு ஏற்படுதல் போன்றன முக்கிய காரணிகளாக இருக்கின்றன. அதாவது, பெண் உறுப்பில் பருக்கள்&nbsp;ஏற்படல். பருவமடையும் நேரங்களில் இது உருவாகக்கூடும். இருப்பினும், இவை தானாகவே மாறிவிடக் கூடியவை. அவ்வாறு மாறாவிட்டால் மயிர்க்கால்களை அடைத்து அந்த இடத்தில் மேலும் தொற்றை அதிகரிக்க வாய்ப்புண்டு. இதுபோன்ற புண்கள், கட்டிகள் கர்ப்பப்பை குறைபாட்டினாலும் ஏற்படுகின்றது. இதிலிருந்து விடுபட சுத்தத்தைப்பேணி சுகாதாரமான உள்ளாடைகளை உபயோகிப்பது மிக அவசியமாகும். சிறுநீர்ப்பைத்தொற்று, ஆண்களை விட பெண்களுக்கு ஏற்படுகிறது. அதாவது, குறுகிய சிறுநீர்ப்பை பெண்களுக்கு இருப்பதால் எளிதில் சிறுநீர்ப்பாதைத் தொற்றுக்குள்ளாகி விடுகிறார்கள். பெண்களின் சிறுநீர்ப்பாதையை பக்டீரியாக்கள் மிக வேகமாக அடைந்து அங்கு நோய்த்தொற்றை உருவாக்கிவிடுகின்றன. எமது அந்தரங்கப் பாதைகளை சுத்தமாக வைத்திருப்பது நல்லதாகும். சிலருக்கு சிறுநீர் கழிக்கும்போது எரிச்சல் உண்டாகிறது.&nbsp;சிலநேரங்களில் இறுக்கமான ஆடை கூட அரிப்பை ஏற்படுத்தக்கூடும். சவர்க்காரத்தை அதிகமாக உபயோகிப்பதால் கூட இந்நிலைமை ஏற்படலாம். பெண் உறுப்பு மென்மையானது என்பதால் எளிதில் தொற்றுக்குள்ளாக வாய்ப்புண்டு. இந்த உறுப்பு ஹோர்மோன் மாற்றங்களுடன் எளிதாகத் தொடர்பு கொண்டது. பெண் உறுப்பில் ஆசன வாய், சிறுநீர்த்துவாரம், பெண்ணுறுப்பு என்பன அருகருகே இருப்பதனால் ஏதும் ஒன்றில் தொற்று ஏற்பட்டால், அடுத்தடுத்து எளிதில் பரவுகின்றது. இதற்குப் பொதுவான காரணம், சுகாதாரமின்மையேயாகும். இருப்பினும், அளவுக்கதிகமான அரிப்பு இருப்பின் வைத்தியரை அணுகி ஆலோசனை பெறுவது நல்லது. ஏனெனில், எல்லாக் காலங்களிலும் அரிப்பு இருப்பின், அது பெண் உறுப்பில் தொற்றாகவோ அல்லது திருமணத்துக்குப் பின்னரான பாலியல் நோய்களுக்கான அறிகுறியாகவோ இருக்கலாம்.&nbsp;திருமணமான புதிதில் சிலருக்கு ஏற்படக்கூடும். இந்நிலை தொடர்ச்சியாக அல்லது அடிக்கடி தொடருமானால் பால்வினைத் தொற்றாகவும், மாதவிடாய்க்கு முன்பு ஈஸ்ட்ரஜன் ஹோர்மோன் செயற்பாட்டாலும் ஏற்படலாம். 40 வயதுக்கு மேல் மாதவிடாய் நிற்கும் காலத்தில் ஹோர்மோன் சுரப்பு குறைவடையத் தொடங்கும். அதிகமாக இவ்வயதினரே எரிச்சலுக்குள்ளாகின்றனர். ஏனெனில், அக்காலகட்டத்தில் ஏற்படும் வறட்சித்தன்மையே இதற்குக் காரணமாகும். அதிகப்படியான சீனியின் அளவும் அரிப்பை ஏற்படுத்துவதற்கு ஒரு காரணமாகவும் இருக்கின்றது. பெண்களின் பிறப்புறுப்புப் பகுதியில் இயற்கையாகவே குறிப்பிட்டளவில் பக்டீரியாக்கள் காணப்படுகின்றன. அவற்றின் இயற்கைச் சமநிலை மாறும்போதும், அந்தரங்க உறுப்பை சுத்தமாக வைத்திருப்பதாகக் கருதி பலவிதமான வாசனை சோப் வகைகள், பவுடர்கள் என்பவற்றை உபயோகிப்பதனாலும், உள்ளாடைகளை சுத்தமின்றி பாவிப்பதனாலும், இளம் வயதுப் பெண்கள் சவரம் செய்வதாலும் மயிர்க்கால்கள் பாதிப்படைந்து தொற்று ஏற்பட்டு அரிப்பு ஏற்படுகின்றது. மன அழுத்தத்தால் ஹோர்மோன்களின் செயற்பாட்டில் தாக்கத்தை ஏற்படுத்துவதாலும், மறைமுகமாக நோய் எதிர்ப்புச் சக்தியில் தாக்கத்தை ஏற்படுத்துவதாலும் இவ்வாறான நிலைமைகள் உண்டாகின்றன. மேலும், பால்வினை நோயின் தாக்கம், சுகாதாரமற்ற கழிப்பறைகளை உபயோகித்தல், மலக்குடலிலுள்ள புழுக்கள் ஆசன வாயில் வந்து முட்டை இடுதல்&nbsp;சிறுநீர்த்தொற்றுக்கள் வழியாகவும் வெள்ளைப்படுதல் மூலமாகவும் அரிப்பு ஏற்படுகின்றது. சுகாதார முறைப்படி கழிவறைகளை உபயோகித்தல், உள்ளாடைகளை சுத்தமாகப் பயன்படுத்தல், மாதவிடாய்க் காலங்களில் தினமும் குளித்தல், உள்ளுறுப்புகளை மென்மையாக சவர்க்காரம் மற்றும் மிதமான சுடுநீரில் தினமும் கழுவுதல் போன்றவற்றை செய்வதன் மூலம் இதிலிருந்து பாதுகாப்புப் பெறலாம். மேலும், மன அழுத்தத்தைத் தவிர்க்க தியானம், மூச்சுப் பயிற்சி போன்றவற்றை மேற்கொள்தல், 45 வயதுக்கு&nbsp;மேற்பட்ட பெண்கள் மற்றும் திருமணமான பெண்கள் மருத்துவப் பரிசோதனைகளைச் செய்து சிகிச்சைகளை மேற்கொள்ளல், இளம் வயது பெண்களுக்கு இந்நிலை தொடருமெனின் வைத்தியரை அணுகி சிகிச்சை பெற்றுக்கொள்ளல் வேண்டும். வெள்ளைப்படுதல் என்பது ஒரு நோயல்ல. பூப்படைதலைத் தொடர்ந்து ஹோர்மோன்களின் ஏற்ற இறக்கத்தால் பெண் உறுப்பினூடாக வெள்ளை நிற திரவம் போன்ற பதார்த்தம் வெளியேறுதலாகும். பெண்ணுறுப்பின் ஈரப் பதத்தைப் பேணுவதற்கும், இயற்கையாக அரிப்பு இல்லாமல் பாதுகாப்பதற்கும் திரவம் சுரக்கின்றது. இச்சுரப்பு சுரக்கும் வரை ஏதும் பிரச்சினை இல்லை. ஆனால், நிறம் மாறி, சளித்தன்மை போன்று காணப்படுமாக இருந்தால் அசாதாரண நோய் நிலைமையாக இருக்கின்றது. இயற்கையில் பெண்ணுறுப்பு வாயிலில் சமநிலையைப் பேணும் சில பக்டீரியாக்கள் காணப்படுகின்றன. இவை மணமோ நிறமோ கொண்டிருப்பதில்லை. சுகாதாரமின்மை, முறையற்ற சவர்க்காரப் பாவனை அழற்சி, நீரிழிவு&nbsp;உடல் காங்கை, பெண்ணுறுப்பு எரிச்சல், ஈஸ்ட் தொற்றுகள், மன அழுத்தங்கள், பிறப்புக்கட்டுப்பாட்டு மாத்திரைகள் பயன்படுத்தல் மற்றும் பாலியல் நோய்கள், கர்ப்பப்பை புற்றுநோய் போன்றன இதற்குக் காரணங்களாக அமைகின்றன. எனினும்,&nbsp;கர்ப்ப காலங்களில் இது இயற்கையில் ஏற்படக்கூடிய நிகழ்வாகும். பிசுபிசுப்புத்தன்மை கொண்ட இத்திரவம் பாதிப்புக் குட்பட்டால் அதன் அமில காரத் தன்மை பாதிப்படையும். தொற்று மேலும் தீவிரமடைந்தால் சிறுநீர்ப்பையையும், கர்ப்பப்பை வாயையும் பாதிக்கக்கூடும். கர்ப்ப காலத்தில் ஹோர்மோன்களின் செயற்பாடுகளின் மாற்றத்தால் அரிப்பு, எரிச்சல் மற்றும் வெள்ளைப்படுதல் போன்ற நிலை உண்டாகலாம். கருக்கலைப்பு, குறைப்பிரசவம், தன்னிச்சையான பிரசவம்&nbsp;அம்னியோட்டிக் தொற்று போன்ற நிலைகள் உருலாகலாம். இதற்கு முறையான சுகாதார நடைமுறைகள், பருவ காலங்களுக்கேற்ப சீரான உணவுப்பழக்க வழக்கங்கள், இயற்கையோடு இணைந்த வாழ்க்கை முறைமை, மன அழுத்தமின்மை என்பன சிறந்த தீர்வுகளாகும். எனினும், மேற்குறிப்பிட்ட அசாதாரண நிலைமை காணப்படுமிடத்து வைத்தியரை அணுகி சிகிச்சை பெற்றுக்கொள்ள வேண்டும். கர்ப்ப காலங்களில், இந்நிலை காணப்பட்டால் அசமந்தப்போக்கில் இல்லாது மகப்பேற்று வைத்தியரை அணுகி ஆலோசனை பெறவேண்டும். மட்டு. துஷாரா

பெண்ணியல் நோய்கள் என்றால் என்ன?

பெண்ணியல் நோய்கள் என்றால் என்ன?

You may also like