சிகிச்சைக்காக ஓய்வெடுத்த பைடன் – கமலா ஹாரிஸிடம் வழங்கப்பட்ட அதிகாரம்

அமெரிக்க ஜனாதிபதி ஜோ பைடன் , உடல் பரிசோதனைக்காக மருத்துவமனையில் அனுமதிக்கப்பட்டு இருப்பதால் அமெரிக்க ஜனாதிபதிக்கான அதிகாரம் துணை ஜனாதிபதி கமலா ஹாரிஸுக்கு வழங்கப்பட்டுள்ளது. இது குறுகிய காலத்திற்கான அதிகாரம் ஆகும்.

ஜனாதிபதி

கடந்த ஜனவரியில் ஜனாதிபதியாக பதவி ஏற்றபின் பிடன் குடல் பரிசோதனை செய்யவில்லை. இதையடுத்து இன்று மருத்துவமனையில் அனுமதிக்கப்பட்டார். மருத்துவ சோதனைகளுக்காக பைடனுக்கு மயக்க மருந்து கொடுக்கப்பட்டது. அவர் மயக்க நிலையில் இருப்பதால் சட்டப்படி சிகிச்சை முடிந்து மருத்துவர்கள் சான்று அளிக்கும் வரை அவர் ஜனாதிபதியாக இருக்க முடியாது.

அமெரிக்க விதி

அமெரிக்க விதிகளின்படி ஜனாதிபதி பதவியை வகிக்க உடல் ரீதியாகவும் தகுதியாக இருக்க வேண்டும். சுயநினைவோடு இருக்க வேண்டும். இதனால் அவர் மருத்துவமனையில் இருந்து திரும்பும் வரை ஜனாதிபதிக்கான அதிகாரம் தானாக துணை ஜனாதிபதிக்கு சென்றுவிடும். அதன்படி உடல் பரிசோதனைக்காக பைடன் மருத்துவமனையில் அனுமதிக்கப்பட்டு இருப்பதால் அமெரிக்க ஜனாதிபதிக்கான அதிகாரம் துணை ஜனாதிபதி கமலா ஹாரிஸுக்கு வழங்கப்பட்டுள்ளது. ஆனால் இது குறுகிய காலத்திற்கான அதிகாரம் ஆகும்.

மீண்டு வருவார்

பைடன் மீண்டும் வந்ததும் தானாக அவர் ஜனாதிபதியாக ஆகிவிடுவார். இந்த குறுகிய காலத்தில் கூட கமலா ஹாரிஸுக்கு ஜனாதிபதிக்கான முழு அதிகாரமும் வழங்கப்படும். அதாவது அணு ஆயுதங்களை இயக்கும் அதிகாரம் தொடங்கி, முப்படையை கட்டுப்படுத்தும் அதிகாரம் வரை அனைத்தும் வழங்கப்படும். பைடன் வரும் வரை வெள்ளை மாளிகையில் ஜனாதிபதி இருக்கும் வெஸ்ட் விங்கில் கமலாதான் இருப்பார்.

கமலா

கமல் ஹாரிஸ்தான் அமெரிக்காவின் முதல் பெண் துணை ஜனாதிபதி. இப்போது குறைந்த நேரத்திற்கு ஜனாதிபதியாக அவர் அதிகாரம் பெற்றுள்ளார். ஒருவகையில் அமெரிக்காவின் முதல் பெண் ஜனாதிபதி கமலா ஹாரிஸ் என்றும் கூட இதை வைத்து அழைக்கலாம். இவர் தமிழ்நாட்டை பூர்வீகமாக கொண்டவர் என்பது குறிப்பிடத்தக்கது.

புஷ்

இதற்கு முன் 2002, 2007ல் ஜோர்ஜ் புஷ் மருத்துவமனையில் அனுமதிக்கப்பட்ட போது துணை ஜனாதிபதிக்கு சில காலம் ஜனாதிபதி அதிகாரம் வழங்கப்பட்டது. பைடன் உடல்நிலை சரியாக இல்லாத காரணத்தால் மீண்டும் அவர் அடுத்த ஜனாதிபதி தேர்தலில் நிற்பது சந்தேகமே. மீண்டும் ஜனாதிபதி தேர்தலில் நிற்கும் விருப்பம் பைடனுக்கு இருந்தாலும் கூட அவரின் உடல்நிலை ஒத்துழைக்குமா என்பது சந்தேகமே.